Ynghylch Groundwork

Mae Groundwork yn elusen sy’n gweithio’n genedlaethol a lleol i drawsnewid bywydau yng nghymunedau mwyaf difreintiedig y Deyrnas Unedig.
Rydym ni’n teimlo’n angerddol dros greu dyfodol lle mae pob cymdogaeth yn fywiog ac yn wyrdd, lle mae pob cymuned yn gryf ac yn gallu llunio ei thynged ei hun a lle nad oes neb yn cael ei ddal yn ôl gan ei gefndir na’i amgylchiadau. Rydym ni’n helpu pobl i fagu hyder ac ennill sgiliau, dechrau hyfforddiant neu waith, gwarchod a gwella mannau gwyrdd, byw bywydau mwy egnïol a goresgyn heriau sylweddol fel tlodi, arwahaniad, diffyg sgiliau ac iechyd gwael.

Pam mae angen ein gwaith

Y Deyrnas Unedig yw un o’r cenhedloedd cyfoethocaf yn y byd. Er hynny, mae llawer o bobl mewn llawer o gymunedau’n wynebu caledi sylweddol.

  • Mae gostwng gwariant cyhoeddus yn barhaus yn golygu bod yna berygl mwy o anghydraddoldeb cymdeithasol a mwy o anghyfartaledd daearyddol wrth i’r gwasanaethau mae pobl yn dibynnu arnyn nhw gael eu torri.
    Y gwasanaethau yn y gymdogaeth sy’n gwella ansawdd ein bywydau – o glybiau ieuenctid i barciau – fydd yn dioddef gwaethaf o’r gostyngiadau mewn gwariant.
  • Wrth i’n heconomi a’n system lles newid, bydd rhai pobl mewn rhai rhannau o’r wlad yn parhau i fod wedi’u hymyleiddio ac yn agored i niwed.
  • Bydd effeithiau amgylcheddol – o lifogydd i godiadau mewn prisiau ynni – yn cael effaith anghymesur ar y rheiny sydd â’r amddiffyniad lleiaf.

Er mwyn mynd i’r afael â’r heriau hyn bydd angen syniadau a dulliau gweithio newydd, gan ymgysylltu â chymunedau a busnesau, yn ogystal â ffyrdd newydd o ddarparu gwasanaethau cyhoeddus.

Sefydlwyd Groundwork ar adeg pan roedd yna heriau gwleidyddol, cymdeithasol ac economaidd, fel arbrawf i helpu cymunedau i ymdopi â newid ac i gydweithio i wella eu bywydau a’u cymdogaethau. Ni fu erioed mwy o angen am y profiad hwnnw a’r ysbryd mentergarwch ac arloesedd hwnnw.

Yr hyn sy’n ein sbarduno yw cydnabod y ffaith bod gan bob cymuned – waeth pa mor ddifreintiedig – gronfeydd mawr o falchder yn yr ardal leol a phobl â’r brwdfrydedd a’r syniadau i wella eu hamgylchiadau a’u hamgylchoedd.

Mae Groundwork yn bodoli i harneisio’r balchder hwnnw a datgloi’r brwdfrydedd hwnnw trwy wasanaethau, prosiectau a rhaglenni sy’n newid bywydau pobl heddiw ond sydd hefyd yn gwneud ein cymunedau’n fwy gwydn at y dyfodol.